Mar 16 | AOJFILIFITA | STEP | Nemaf anama sapoma nomaꞋwanai nafeꞋ hiꞋalana, Maria MakdalaiꞋwi kwaloma Maria mamaꞋwana Jems kwaloma Salomi watala anom wel alogw buꞋwami maꞋami. Awau waꞋi ofaꞋam ofeꞋ ondisa alop Jisasi.

f - Mk 16:17Ap 2:4Ap 8:7; 10:46

Mark 16

Jisas notanima nohafel wapotiꞋ

(Mt 28:1-8; Lu 24:1-12; Jo 20:1-10)

1 Nemaf anama sapoma nomaꞋwanai nafeꞋ hiꞋalana, Maria MakdalaiꞋwi kwaloma Maria mamaꞋwana Jems kwaloma Salomi watala anom wel alogw buꞋwami maꞋami. Awau waꞋi ofaꞋam ofeꞋ ondisa alop Jisasi. 2 Wafilu nemaf Sande, kuhimbita atona awau ofaꞋ wel amama wafeꞋ hiꞋagif. 3 Awau ataꞋ wafeꞋ etin eaf, wandaꞋipama naꞋama waꞋi, “Atuwasi emi nigiambamafa nelefata owap anama nowalo utai?”

4 EaꞋ watologon, wati owap anama luꞋunai ina ataꞋ nape nowalo uta, owaꞋ. Enin epen nafeꞋ nausiꞋana nafeꞋ naꞋoh waꞋol. 5 Awau wawis hiꞋagif nomon, wati anona aman saꞋunai tol nape uta waꞋol lagel daꞋisinaima. Nala anona lowaf launai afitinai. NaꞋama awau gegelalasowa kwapeteꞋawa umbamahawa. 6 EaꞋ anan naꞋipawa naꞋama naꞋi, “IpeꞋ ina umbamehepa, owaꞋ. AeꞋ egawepa ipeꞋ pafiꞋi pegolopa Jisas Nasaretinai, esis saundana nagaꞋ lawag usiꞋinai tuꞋwanainai. Anan notanima nohafel eaꞋ, ina ataꞋ nape naꞋae, owaꞋ. IpeꞋ piti naꞋae sofaꞋana sawisi salana nalama. DeiꞋ wafigin nape. 7 EaꞋ ipeꞋ foꞋo piꞋipa alupumi ananimi eaꞋ piꞋipa Pita nalomam naꞋama piꞋi, ‘Jisas naliꞋipa nafeꞋ etap hiagoma Galili. IpeꞋ pefoꞋo petolona siꞋi nimbewaꞋ naꞋipipa.’ ”

8 EaꞋ wakwaha hiꞋagif wawisi andeꞋ wasagih wafeꞋ. Awau umbamahawa wandaꞋam bombol etin. EaꞋ awau ina waꞋipasa basefa enis epes, owaꞋ.

Maria MakdalaiꞋwi kwati Jisas

(Jo 20:11-18)

9 [Jisas notanima nohafel Sande ^{▼▼Niti futnot Matyu 28:1} kuhimbita atona, eaꞋ naliꞋ natagama Maria MakdalaiꞋwi, fowaꞋ natofamaꞋwa ambagof awami 7-peleim mapaiꞋwi. 10 AkwaꞋw kwafeꞋ anagon alupumi Jisasi mapoma. Ukup amamumi nimanim endilisi, mape malef. 11 EaꞋ kwaꞋipam kwaꞋi, “AeꞋ ati Jisas notanima nohafel wapotiꞋ nape namunai.” ^{b
,} ^{c
,} ^{d
,} ^{e
,} ^f

Amam mameꞋ basef amama akoꞋumi, eaꞋ ina memeꞋ basef akwaꞋumi maꞋi endilisimi, owaꞋ.

Amam biam alupumi Jisasi matolona eaf nafeꞋ Emeusi

(Lu 24:13-35)

12 Amama mataga eaꞋ, anom alupumi Jisasi biam makwaha wambel luꞋunai maila eaf nafeꞋ aolopi mafeꞋ. EaꞋ Jisas nandati naꞋana nafeꞋ natagamam. 13 Amam biam matolona motanima mafeꞋ mawalapa basef amama ma anom alupumi Ananimi mapani, eaꞋ amam ina mombaleꞋefam, owaꞋ.

Jisas naseꞋama maol amam alupumi ananimi

(Mt 28:16-20; Lu 24:36-49: Jo 20:19-23)

14 Amama mafeꞋma eaꞋ, alupumi 11-peleim Jisasi mape maꞋ gwaꞋaimi etin, Jisas nafeꞋ natagamam. NimbewaꞋ enis satolona notanima nohafel wapotiꞋ eaꞋ saꞋipa amam ma Anan nahafel eaꞋ. OwaꞋ. Amam ina membaleꞋefas maꞋi saꞋi endilisi, owaꞋ. MaꞋi opalef amamumi masoꞋ. NaꞋama Jisas naꞋipama basef laꞋifimi.

15 EaꞋ naꞋipam naꞋama naꞋi, “IpeꞋ pefeꞋ wambel hiagoma piꞋipasa basef buꞋwami Godi ma amam nematawa hiesi hiꞋilas. 16 Emi egafis sembaleꞋefa aeꞋ sofaꞋ baptais, anona nemaf God notanima nefaꞋasi wapotiꞋ eaꞋ Ananisi. EaꞋ isima owaꞋ sembaleꞋifi, anona nemaf God nondaꞋmas kota basef luꞋwami ma waf aonai esis sandaꞋanai. 17 God nambimb nondaꞋ esis isima sembaleꞋefi sotaga laꞋifisa sondaꞋ ikwaf hianai naninani siꞋi anan nandaꞋanai. EaꞋ sohaliꞋ AeꞋ ma endaꞋas sotaga laꞋifisa siliꞋamona ambagof awami mapeisi, eaꞋ siꞋi anona diga hianai dambainai. 18 EaꞋ sohapila iguf mahasi lagof asasimi eaꞋ ina mohas sogaꞋ, owaꞋ. EaꞋ seaꞋ embel numbutimi wapotiꞋ, esis ina sogaꞋ, owaꞋ. EaꞋ enis owaꞋ seambaleꞋefi, seaꞋ embel amama, esis sogaꞋ. EaꞋ nambimb esis isima sembaleꞋifi sosa lagofa enis epes awes nandaꞋasi sotaga boꞋwes wapotiꞋ.”

God nofaꞋ Jisas nalata heven

(Lu 24:50-53; Ap 1:9-11)

19 Dembinai Jisas nawalipas naꞋipas eaꞋ, God nofaꞋana nalata heven. EaꞋ nofaꞋ agel luꞋunai nape lagel daꞋisinai Godi. 20 EaꞋ alupumi Ananimi mafeꞋ gani wambel hiagoma mawalapa basef Godi. Anan nandaꞋam mataga laꞋifim mandaꞋ ikwaf hianai naninani siꞋi God nandaꞋanai. Enis epes sati maol anama amam mandaꞋanai saꞋi, “Endilisi, God nagiambama amam eaꞋ apeꞋ magawa basef Ananimi endilisimi.”]